ماكـل من شــال المســمّى تميــمي . . . الـعود بعضــه فاقـد ٍ ريـحة الطـيب
كلمــة تميمي مـهْـرها مـايـشيمــي . . . الا لــمـن تمّــم فعــول الاعــاريــب
ماخِـبْـر ذيـب ٍ قـد فِـرِس بالعتيـمي . . . بـأول شبابــه صوّبــتْـه الاطانــيب
وماخـبْـرشيخ ٍ دون عقـل ٍ سليمي . . . من بوزه المفقوق تلمح به العيب
وبـطرفــه الــمبهــوت ذل ٍ مقيـمي . . . عين السروق اللي تحفّه مشاعيب
مــهادلَه تـنطــق بنقــص ٍ مديمــي . . . بــلاهتَه فــهــاوتَه والــمضاريــب
فــطيَستَه مــاهــي لــحر ٍ عديمـي . . . تـلبق لـجسّيّـس ٍ يجر الـمساحـيب
أمـان لا طــق دَقـلــتَه والبريمــي . . . وعــمامة ٍ صفــرا تشد المـعازيب
يــعبّط الخــشّـه بلــحــن ٍ رخيـمي . . . يــلعي بصـوت ٍ بحّتَه تدعي الذيب
الــعز مــاهــو لوحــة ٍ تـستقيــمي . . . وكرسي ٍ مخلّى لبعض المحاسـيب
مــع مقرفــون ٍ لاحضنْه السقيمي . . . يـضفي على زيف النوايا الاعـيب
الــعــز نــيّــات ٍ بــقلــب ٍ ســليمي . . . ومصاحَب الحق المـوثّق بتعقيـب
هــذي بيــوت ٍ صغتهــا للـفهيمـي . . . فصلّـت طاقـتها على كاذب الطيب
شِعره ليا نامـوا ربوعه حصيمـي . . . وشـيـختْه دون مطـبّلينـه تهابيـب
يـغطّي العـوره سـواة الـحـريمـي . . . ابــمشلـح ٍ يخـفي وراه العـذاريب
طفخ ٍ مـدح روحه بجمع ٍ عميمي . . . وبـطـانـتَـه تـمـجّـدَه بـالـهنـاديــب
هــذاك مــاييزيه ســب الــغريمي . . . مــع الهجا يلزمْه لَــجْـن ٍ وتأديب
ذمـيم ومـن يتبـع دروبـه ذميـمي . . . ياكـود منـهو منـخدع بالاسـاليب
الله يــكــرّم داقــمين الخـصيمــي . . . عن مرّوْح ٍ سرّه بعكس المكاتيب
يــطيح بــأول رقــلة ٍ كالحـطيمي . . . يــعوّد لــممشاه قطْـو المجابــيب
الــعص عــص ٍ لوتشقلب بغيمي . . . صــيّور مــايرجع لـمنزاله ذنـيب
والــروس تبــقى ابمقـام ٍ كريمي . . . حتـى ولو عم البسـيطه عراقيب
لويـكـثْـر اللجـّات جـمـع ٍ بـهيمي . . . صواعق الحق يلجمَنّ الجلاليـب
بـوّيـن ٍ ترفـدهم جـموع ٍ تهيمـي . . . من خلـفهم امحصليـن ٍ مكاسيـب
تــميم تضــويها بــدور ٍ تشيمـي . . . لاهــلّـت اتغـم الاتـاريـك وتغـيب
